Bakının Sabunçu rayonu, Maştağa qəsəbəsinin mərkəzi küçələrindən biri sakinlərin narazılığına səbəb olub. Bu haqda bu gün, 23 noyabr tarixində Bakuplus.az Ölkə.az-a istinadən məlumat verir.
Sakinlər bildirirlər ki, yağışdan sonra Zərdabi küçəsi keçilməz olur. Küçənin başlanğıcı və sonuna az da olsa, asfalt çəkilsə də, ortası baxımsız vəziyyətdə qalıb.
Məsələ ilə bağlı Sabunçu Rayon İcra Hakimiyyətindən qeyd edilib ki, qəsəbə yollarının asfaltlanması ilə Azərbaycan Avtomobil Yolları Dövlət Agentliyi (AAYDA) məşğuldur və yollar mərhələli şikildə təmir olunur.
AAYDA-nın nümayəndəsi isə əlavə edib ki, icra hakimiyyətləri və bələdiyyələr dövlət proqramına salınması üçün öz balanslarında olan yollarla bağlı aidiyyəti üzrə müraciət etməlidirlər.
“Əgər bu yol dövlət proqramına salınmış olsaydı, artıq AAYDA tərəfindən təmir olunardı. Proqrama salınması üçün təklif göndərilibsə, növbəti illərdə dövlət proqramına salınacaq, icrası AAYDA-ya tapşırılacaq və təmir həyata keçiriləcək”, – deyə agentlikdən bildirilib.
