Bu ildən etibarən magistraturaya imtahan vermək istəyən şəxslər ingilis dilindən 20 sualdan əlavə, esse də yazacaqlar. Esseyə verilən müddət 30 dəqiqədir və ən azı 150-200 sözlə əhatə edilməlidir. Bu haqda bu gün, 27 yanvar tarixində Bakuplus.az AzTv-yə istinadən məlumat verir.
Bu yenilik tələbələr arasında fikir ayrılığına səbəb olub.
İngilis dilini tədris edən pedaqoqlar da yeniliklərlə bağlı birmənalı düşünmürlər.
İmtahan iştirakçılarından əvvəlcədən məlum olmayan 2 fərqli mövzu üzrə esse yazmaq tələb olunacaq. Onlar bu mövzulardan yalnız birini seçə bilərlər. İmtahanda yazı bacarıqlarının yoxlanılması ilk dəfə tətbiq olunduğu üçün Dövlət İmtahan Mərkəzi bəzi güzəştlər nəzərdə tutub.
“İmtahanın vaxtına əvvəl 3 saat vaxt verilirdi ki, buna da yarım saat vaxt əlavə olunaraq, ümumilikdə imtahan üçün ayrılan vaxt 3 saat yarımdır. Səhvlərin hesablanması qaydası bizdə belədir ki, təkrarlanan səhvlər eyni dil qaydasına aid olarsa, bir səhv olaraq nəzərdə tutulur. Yəni siz hər hansı bir sözün yazılışında 1 dəfədən çox səhv edirsinizsə, biz onu 1 səhv olaraq götürürük. Çünki bu, bizdə o fikri yaradır ki, siz bu sözün yazılışını bilmirsiz. Yəni həmin sözü bir neçə yerdə səhv etmisinizsə, hər dəfə bu səhv olaraq nəzərə alınmır”, - Dövlət İmtahan Mərkəzinin şöbə müdiri Könül Hacıyeva deyib.
Ekspertlərin fikrincə, bakalavr pilləsini başa vuran tələbə tədris gördüyü xarici dildə esse yazmaqda çətinlik çəkməməlidir.
Bu il magistratura imtahanı fevralın 11-i keçiriləcək.
