Suraxanı rayonunun Əmircan qəsəbəsi, Atamoğlan Rzayev küçəsində yaşayan sakinlər ərazidə aparılan tikintiyə etiraz edirlər. Bu haqda bu gün, 24 iyul tarixində Bakuplus.az Xəzər Xəbər-ə istinadən məlumat verir.
Yerli sakinlərin sözlərinə görə, ərazidə artıq hörgü işlərinə başlanılıb, həmin sahədə olan şam ağacları hasara alınıb.
Sakinlər bildiriblər ki, təxminən 4 gün öncə onlar hələ bu ərazidə dincəlir, uşaqlar isə oyun oynayırdılar. Amma məhəllənin digər sakinləri qonşuların fikirləri ilə razı deyillər. Öz növbəsində vətəndaşlar iddia edirlər ki, sözügedən ərazi heç vaxt istismarda olmayıb və bir neçə gün əvvəl bu sahə zibil poliqonunu xatırladırdı.
Tikinti işlərini icra edən Cavid Abışovun sözlərinə görə, onların Bakı Şəhər İcra Hakimiyyətindən (ŞİH) müvafiq sərəncamı var və torpaq onlara aid olduğuna görə burada hasar çəkilir. O, tikinti zamanı ərazidə olan yaşıllığa toxunmayacaqlarını vəd edib.
