Bakının Nərimanov rayonunun Mayakovskiy, 11 ünvanında yaşayan sakinləri həmin ərazidə ağacların kütləvi şəkildə kəsildiyini iddia edirlər. Bu haqda bu gün, 23 avqust tarixində Bakuplus.az 1news.az-a istinadən xəbər verir.
Sakinlərin sözlərinə görə, hazırda boş olan və söküntü işlərinə hazırlanan 8 saylı poliklinikanın ərazisində 40 illik ağacların qanunsuz kəsilməsi aparılır. Onlar, həmçinin əlavə ediblər ki, buradakı poliklinikanın əvəzinə sahədə fərdi bir obyekt tikiləcək və bu səbəbdən irigövdəli ağacların kəsilməsi də nəzərdə tutulub.
“Şübhələrimizə görə, kəsilmənin diqqəti cəlb etməməsi üçün ağaclar hissə-hissə məhv edilir. Biz də öz növbəmizdə polisə müraciət eləmişik”, - deyə sakinlər əlavə ediblər.
Azərbaycan Ekologiya və Təbii Sərvətlər Nazirliyinin mətbuat katibi İradə İbrahimovanın sözlərinə görə, sözügedən şikayətlə bağlı araşdırma aparılacaq.
Daha öncə, 4 avqust tarixində məlum olmuşdur ki, 8 nömrəli poliklinika təmirə bağlanılır.
