Bakının Nərimanov rayonunda binadan yolun ortasına düşən daş sakinlərin narahatlığına səbəb olub. Bu haqda bu gün, 14 may tarixində Bakuplus.az ATV-yə istinadən xəbər verir.
Bir neçə müddət öncə Nazim Hacıyev, 34 ünvanında yerləşən yaşayış binasının fasadından üzlük daşı qoparaq intensivliyi yüksək olan yola düşüb. Heç kim xəsarət almasa da, bu, sakinlərin narahatlığına səbəb olub.
“Bunun səbəbi istifadə olunan keyfiyyətsiz mallardır. Alt hissəsindən sement düz vurulmadığına görə, daşlar qopub düşür. Məcbur oluruq yola çıxaq, orada da avtomobillər keçir”, - deyə sakinlər şikayət edirlər.
Binaya nəzarət edən Əli adlı şəxs bildirdi ki, binanın üzlük daşlarına baxılması üçün əraziyə kran cəlb edilməlidir.
“Ən böyük kran 48 metrdir. Ondan cəmi 3 ədəd olduğuna görə, növbə ilə işlətmək lazımdır. Işlər çox olur deyə gələ bilməyib. Bütün daşlar bir-bir yoxlanılacaq”, - deyə nəzarətçi qeyd edib.
Təhlükəsizlik məsələləri üzrə ekspert Elmar Nurəliyevin sözlərinə görə, tikinti prosesi başa çatdıqdan və istismara verildikdən sonra binalara qulluq göstərilməlidir.
“Nəzərə almaq lazımdır ki, əgər qulluq vaxtında göstərilməzsə, korroziyaya, deformasiyaya uğrama, daha sonra yağışdan, sudan, nəmişlikdən, rütubətdən daş parçasının dağılıb düşməsinə və yaxud elektrik sisteminin sıradan çıxmasına, kanalizasiya su sisteminin sıradan çıxmasına gətirib çıxara bilir”, - deyə ekspert qeyd edib.
Əlavə olaraq, ekspertlər bu cür halların baş verməməsi üçün MTK rəhbərliyinin vaxtında binalara baxış keçirməsinin zəruriliyini qeyd ediblər.
