Bakının Nəsimi rayonu, Hüseynbala Əliyev küçəsində beşmərtəbəli binada yaşayan sakinlər iddia edirlər ki, ötən əsrin 50-ci illərində tikilən binanın birinci mərtəbəsində qanunsuz olaraq söküntü işləri aparılır. Bu haqda bu gün, 28 dekabr tarixində Bakuplus.az Xəzər Xəbər-ə istinadən məlumat verir.
Binanın qəzalı vəziyyətə düşməsindən narahat olan sakinlər aidiyyəti qurumları məlumatlandırsalar da, məsələ həll olunmayıb.
“Siz təsəvvür edin ki, bu istismar müddətini başa vurmuş evin dayaq nöqtələrini söküblər. Divarları sökürlər, burada kafe düzəldirlər”, – deyə sakinlərdən biri bildirib.
Əraziyə məsuliyyət daşıyan 33 saylı Mənzil-Kommunal İstismar Sahəsindən cavab almaq mümkün olmayıb.
Problemlə bağlı Nəsimi Rayon İcra Hakimiyyətindən bildirildi ki, sözügedən binadakı söküntü işləri ilə bağlı FHN məlumatlandırılıb. Ərazidə qısa müddətdə araşdırmalara başlanılacaq.
