Bakının Nəsimi rayonu, Sabit Rəhman küçəsində yaşayan sakinlər yolsuzluqdan narazıdırlar. Bu haqda bu gün, 13 yanvar tarixində Bakuplus.az Baku TV-yə istinadən məlumat verir.
Sakinlər deyirlər ki, vaxtilə küçə tam asfaltlanmış olub. Lakin tikinti işləri aparıldıqdan sonra yol örtüyü tamamilə dağılıb.
“Yol çox yaxşı idi. “Azərişıq”, sonra da “Azərsu” gəlib qazdı. Kimin ağlından nə keçirsə, qazırlar, sonra da məhəllə camaatı torpaq içində hərəkət etməli olur. Nə evdən çıxa bilirik, nə də evə gedə bilirik. Ayaqlarımız palçığa, suya batır”, – sakinlərin biri deyib.
“Azərsu” ASC-nin sözçüsü Anar Cəbrayıllının sözlərinə görə, lazimi təmirlə bağlı aidiyyəti qurumlara müvafiq müraciət göndərilib.
“Azəravtoyol”-un sözçüsü Anar Nəcəfli isə məsələ ilə bağlı tam əks məlumat verib: “Sözügedən ərazidə işlərin yekunlaşması ilə bağlı agentliyimizin tabeli təşkilatına hər hansı bir məlumat verilməyib, bu üzdən orada təmir işləri icra olunmayıb. Bu gün məlumat verilib və məlumat daxil olan kimi əraziyə təmir briqadası göndərilib. Gün ərzində həmin ərazidə asfalt-beton örtüyünün bərpası istiqamətində işlər aparılaraq yekunlaşdırılacaq”.
