Nəsimi rayonu, Abbas Səhhət, 33 ünvanında tikinti şirkəti sakinlərlə razılaşa bilmir. Bu haqda bu gün, 26 yanvar tarixində Bakuplus.az ARB-yə istinadən xəbər verir.
Sözügedən ərazidə yeni yaşayış kompleksi inşa olunur. Ancaq yaxınlıqdakı köhnə tikililərdə yaşayan sakinlər evlərinə ciddi ziyan dəydiyini, onlarla razılaşmadan inşaat işlərinin aparıldığını vurğulayırlar.
“Bizə kv/m-ə görə 2500 AZN pul verirlər. Halbuki buranın torpaq dəyəri 4000-dən çoxdur. Bizə deyirlər ki, gedib Mehdiabadda yaşayaq. Niyə şəhərin mərkəzini qoyub ora getməliyik ki?!” – deyə sakinlər şikayət edirlər.
Onlar bildirirlər ki, ev və yaxud istədiyimiz pulu versinlər bu dəqiqə buradan çıxırıq.
“Capital City” MTK-nın nümayəndəsi Bəxtiyar Cəfərov məsələ ilə bağlı bildirib ki, sakinlər fantastik məbləğlər istəyirlər:
“300.000 AZN pul istəyir 71 kv.m üçün. Biz 20% divarın çölündən hesablayaraq uyğun ödəniş edirik. Kirayə pullarını da ehtiyac olduqca veririk”, – deyə o əlavə edib.
Sakinlər MTK işçilərinin onlara təzyiq göstərdiklərini, evdən çıxmaqlarını tələb etdiklərini deyirlər.
