18 Sentyabr - xalqımız üçün əlamətdar bir gündür. Bu tarixi gün dahi bəstəkar, görkəmli musiqişünas, yazıcı, publisist, ictimai xadim, maarifçi Üzeyir Hacıbəylinin doğum günü və Milli Musiqi günüdür.
Bu münasibətlə Bakuplus.az-ın əməkdaşı Xalq artisti Nəzakət Teymurova ilə danışıb.
- 18 sentyabr Milli Musiqi Günüdür. Bu günün necə qeyd olunmasını istərdiniz?
- Bəli, bu gün Milli Musiqi Günüdür. İllərdir ki, musiqiçilər və dəyərli sənətkarlarımız əlamətdar günü fəxrlə qeyd edirlər. Sevindirici haldır. Əsl sənətkarlar bu gün münasibəti ilə bir-birilərini təbrik edirlər.
- Milli Musiqi günü Üzeyir bəyin adı ilə bağlıdır. Sizcə, bu gün kimi Üzeyir bəyin davamçısı hesab etmək olar?
- Əsl sənətlə məşğul olanları Üzeyir bəyin davamçıları hesab etmək olar. O, əvəzolunmaz sənətkar idi. Azərbaycanın milli, professional musiqisinin təməlini qoydu. Onunla heç kimi müqayisə etmək olmaz. Davamçıları olaraq sənətkarlar onun qoyduğu iz ilə yol gedirlər.
- Sizcə, bu gün musiqimiz hansı səviyyədədir? Savadlı musiqiçilərin sayı azalıbmı?
- Professional ifaçı olduğum üçün peşəkarlar ilə çalışıram. Ona görə, mənim ətrafımda ünsiyyət saxladığım ifaçılar, musiqiçilər professionaldır. Sayı da azalmayıb. Azərbaycan Milli Konservatoriyasında çalışıram. İstər xanəndələr, istərsə də ifaçılar arasında gözəl sənətkarlar yetişir. Savadlı ifaçılarımızın heç vaxt sayı azalmayacaq.
- Muğam sənət aləmində ən çətin janr sayılır. Gənc muğam ifaçılarından razısınızmı?
- Muğam ifaçıları arasında razı olduqlarım da var, olmadıqlarım da. Kimin gücü muğamın çətinliklərinə davam gətirəcəksə, gələcəyi olacaq. Ağır janr olduğuna görə, burada güclülər qalır.
- Üzeyir bəyin hansı əsəri sizin üçün əvəzolunmazdır?
- Üzeyir bəyin bir çox əsəri mənim üçün əvəzolunmazdır. Mən iki operasında çıxış etmişəm. “Leyli və Məcnun” operasında Leylini, “Koroğlu”da xanəndə qız obrazı mənim üçün əvəzolunmazdır. Orada milli dəyərlərimiz və musiqimiz var. Ən əsas da - əziyyət var. Mənim üçün hər şey əziyyətdən başlayır. Üzeyir Hacıbəyov milli musiqimizin bünövrəsini ən çətin zamanda qoydu. Bu günə qədər də elə Üzeyir Hacıbəyovun yolu ilə də gedirik.
- Siz Leyli obrazını canlandırmısınız. Bu barədə danışardınız.
- 1995-ci ildə Leyli obrazını canlandırmışam. Ən sevdiyim rol olub. İllər boyu tamaşaçıların qarşısına çıxmışam. Bir çox ölkələrdə də tamaşa qoyulub. Üzeyir Hacıbəyovun yaratdığı əsərlər hər zaman alqışlar ilə qarşılanıb. Bu sənət hər zaman yaşayacaq. Orada musiqi dəryadır. Ən yaxşı musiqi illər boyu yaşayır. Əsl sənətkarlar musiqimizi yaşadır.
Milli musiqilərimizə maraq hansı səviyyədədir?
- İnsanları məcburən nəyəsə qulaq asdırmaq olmaz. Hər kəsin qəbul etdiyi musiqilər var. Ola bilər kimsə milli musiqini sevmir, ayrı janrlara rəğbət bəsləyir. O demək deyil ki, hamı milli musiqini dinləməlidir. Ailədən də irəli gəlir. İnformasiya dövrüdür. Heç kimi məcbur etmək olmur ki, musiqiyə qulaq as.
