Paytaxtın Nizami rayonu, Tofiq Abbasov küçəsində yerləşən doqquzmərtəbəli binada yaşayan vətəndaşlar istilik problemindən şikayət edirlər. Bu haqda bu gün, 20 dekabr tarixində Bakuplus.az Xəzər Xəbər-ə istinadən məlumat verir.
Müvafiq çətinliklər hər il istilik mövsümünün başlaması ilə yaranır.
Sakinlər qeyd edirlər ki, mənzillərini qızdırmaq üçün başqa vasitələrdən istifadə etmək məcburiyyətində qalırlar və bu, əlavə xərclərə səbəb olur.
“Hansısa mənzillərin istilik almasında mövcud olan problem binadaxili istilik xətlərindən qaynaqlana bilər. Təəssüf ki, həmin binada bir çox mənzillərdə kirayəçilər yaşayırlar və onlar qapıları açmırlar. Bu isə problemin araşdırılması üçün çətinlik yaradır. Lakin sabah işçi qrup həmin ünvanda olacaq və müvafiq mənzillərə yenidən baxış keçiriləcək”, – deyə “Azəristiliktəchizat” ASC-nin rəsmisi Elvin Basqallı açıqlama verib.
Onun sözlərinə görə, mənzildaxili problemlər səbəbindən binaya istiliyin verilməsində problem yaşanır. Mətbuat katibi əlavə edib ki, problemin qısa müddətdə aradan qaldırılması üçün lazımi tədbirlər görüləcək.
