Bakının Nizami rayonu, “Neftçilər” və “Xalqlar dostluğu” metro stansiyalarının yaxınlığında çətinlik yaradan qanunsuz parklanma yerləri müşahidə olunur. Bu haqda bu gün, 29 noyabr tarixində Bakuplus.az ATV-yə istinadən xəbər verir.
“Neftçilər” metro stansiyasının yaxınlığında fəaliyyət göstərən “parkovşik”lər qeyri-qanuni yolla pul yığmağa və ərazidə xaos yaratmağa davam edirlər.
“Sarı jiletlilər” avtomobillərin taksi dayanacaqlarının yerində park olunmasına şərait yaradırlar, həmçinin avtomobillər üçün dayanma-durma qadağan olduğu yerlərdə də nəqliyyat vasitələrini saxlatdıraraq buna görə pul tələb edirlər. Bu səbəbdən yolda tıxac yaranır və piyadalar çətinlik çəkirlər.
Sakinlərin sözlərinə görə, avtomobillərin bu cür parklanması uşaqlar və böyüklər üçün təhlükəlidir.
Analoji vəziyyət metronun “Xalqlar Dostluğu” stansiyasının yaxınlığında da mövcuddur.
Məsələ ilə bağlı Azərbaycan Yerüstü Nəqliyyat Agentliyindən (AYNA) bildirilib ki, “AzParking” infrastrukturu ilə əlaqəli olmayan ərazilərdə parklanmaya görə tələb edilən pul qanuni deyil.
