Bakının Nizami rayonunda bir neçə küçədə xaotik vəziyyət yaranıb. Sakinlər öz şikayətlərini bildirsələr də, problemlərə baxan yoxdur. Bu haqda bu gün, 24 iyun tarixində Bakuplus.az Avtosfer-ə istinadən məlumat verir.
Məmmədəli Şərifli və Rüstəm Rüstəmov küçələrinin kəsişməsində başlayan qanunsuz parkinq Əli Vəliyev küçəsinə qədər davam edir. Yolun kənarında fəaliyyət göstərən obyektlərin sahibləri “ciblər” düzəldərək səkini parkinq kimi istifadə edirlər. Hətta bəziləri “dayanacaq yerləri”nə dəmir maneələr qoyaraq ərazini zəbt ediblər.
Küçələrdə piyadalar üçün ayrılmış zolaqlar zəbt olunub, bəzi hissələr isə mövcud olsa da, bərbad vəziyyətə salınıb.
Bildirilir ki, yaranmış vəziyyətlə bağlı sakinlər dəfələrlə aidiyyəti qurumlara müraciət etsələr də, ərazidə heç bir tədbir görülməyib.
