Son vaxtlar bəzi binaların, metro stansiyalarının və bazarların qarşısında “kənd çolpası” adı ilə üçü 10 manata toyuq əti satılır. Bu haqda bu gün, 13 yanvar tarixində Bakuplus.az APA-ya istinadən məlumat verir.
Azərbaycan Quş Əti, Yumurta İstehsalçıları və İxracatçıları Assosiasiyasının (APEPEA) İdarə Heyətinin sədri Mürvət Həsənli deyir ki, bu cür toyuq əti ölkəmizə, əsasən, Belarusdan gətirilir. Onun sözlərinə görə, bu toyuqlar dondurulmuş vəziyyətdə gətirilir, paketin üzərində isə onların 2-ci sortlu olduğu yazılır. Sadəcə bəzi işbazlar qablaşdırmanı cırıb kənd çolpası adı ilə keyfiyyətsiz məhsul satmağa çalışırlar.
“Azad İştehlakçılar” İctimai Birliyinin sədri Eyyub Hüseynovun sözlərinə görə, broyler fabriklərində yetişdirilən broyler toyuqları kökəlmək üçün intensiv şəkildə qidalandırılır, çəkisi 1 kq-dan çox olduqda isə kəsilərək satışa çıxarılır. O, həmçinin qeyd edir ki, bir gecədə minlərlə cücələr broyler fabriklərində satış çəkisinə çatmamış ölür. Firmaların sahibləri isə onları məhv etmək əvəzinə kəsib satışa çıxarırlar. Çəkisi az olduğuna görə insanlar bunun kənd çolpası olduğuna inanırlar.
Azərbaycanın Qida Təhlükəsizliyi Agentliyindən bildirilib ki, həmin problemlə bağlı onların ətraflı məlumatı yoxdur. Agentlik sosial şəbəkələrdə yayılan iddialar və görüntülərlə bağlı araşdırmaya başlayıb.
