Oynaq ağrıları yaşlanmanın qaçılmaz nəticəsi deyil. Bu fikirləri 93 FM-də yayımlanan “Sağlam radio” verilişinin qonağı, fizioterapevt Könül Məmmədova səsləndirib.
Baluplus.az xəbər verir ki, həkim oynaqlarda yaranan ağrıların çoxsaylı səbəblərlə bağlı ola biləcəyini açıqlayıb.
“İltihabi proseslər, travmalar, infeksiyalar, metabolik pozğunluqlar və ən əsası – oynağın biomexanikasının pozulması oynaqlardakı ağrıların səbəbləri ola bilər. Oynaqlar düzgün hərəkət edə və bədənin yükünü daşıya bilmədikdə, nəticədə ağrı, hərəkət məhdudiyyəti və deformasiyalar ortaya çıxır. Məsələn, menisk yırtığı, çiyin əzələsinin zədələnməsi, oturaq həyat tərzi və ya düzgün aparılmayan idman hərəkətləri bu problemləri yarada bilər”, – deyə həkim bildirib.
Könül Məmmədovanın sözlərinə görə, bir tərəfli əzələ zəifliyi də oynaqların funksiyasını poza bilər. Hətta yastı pəncə, onurğa əyriliyi, çanaq displaziyası, artıq çəki və düzgün seçilməmiş ayaqqabılar da bu zəncirvari təsirin bir hissəsidir.
Müalicəyə gəlincə, fizioterapevt deyir ki, bu, səbəbdən, şiddətdən və xəstənin ümumi vəziyyətindən asılı olaraq dəyişir. İltihablı hallarda dərman müalicəsi, qığırdaq zədələnmələrində isə fizioterapiya və reabilitasiya tövsiyə olunur.
“Osteopatiya, pəhriz və yoqa gimnastikası kimi yanaşı metodlar da biomexaniki tarazlığın bərpasında əhəmiyyətlidir”, – deyə fizioterapevt vurğulayıb.
