Bakının Xəzər və Xətai rayonlarında ümummilli lider Heydər Əliyevin 100 illik yubileyinə həsr olunan ağacəkmə aksiyası keçirilib. Bu haqda bu gün, 23 dekabr tarixində Bakuplus.az rayon İcra Hakimiyyətinə (RİH) istinadən xəbər verir.
Xəzər rayonunun Qala qəsəbəsində, Qala-Pirallahı avtomobil yolunun sol hissəsində aksiya çərçivəsində 300 Eldar şamı və sərv ağacı əkilərək suvarılıb və onlara aqrotexniki qulluq göstərilib. Həmçinin ağacları küləkdən qorumaq üçün dirəklər basdırılıb.
Xətai rayonunda, 116 saylı tam orta məktəbin həyətində 100 meyvə ağacı və 100 Eldar şamı əkilib. Əlavə olaraq rayonun Cavanşir, M.Rüstəmov və Q.Nəbi küçələrində və digər ünvanlarında qurumuş ağaclar yeniləri ilə əvəz olunub və 600 Eldar şamı əkilib.
Tədbirdə rayon rəhbərliyi, idarə, müəssisə və təşkilatların və ictimai birliklərin rəhbərləri, şəhid ailələrinin üzvləri, qazilər və rayon ictimaiyyətinin nümayəndələri iştirak ediblər.
