Paytaxtın Xətai rayonu 165 saylı orta məktəbin həyətində Vətən müharibəsi şəhidləri Abdürrəhmanlı Sübhan Mahir oğlu, Eyvazov Əbülhəsən Balaş oğlu, Rüstəmov Rövşən Orxan oğlu, aprel şəhidi, pilot mayor Musazadə Təbriz Tariyel oğlu və Birinci Qarabağ müharibəsinin şəhidi Fərrux Abbasovunun xatirə lövhələrinin açılış mərasimi keçirilib. Bu haqda Report 7 oktyabr tarixində xəbər verib.
Açılış mərasimində Xətai Rayon İcra Hakimiyyətinin nümayəndələri, şəhidlərin ailə üzvləri və ictimaiyyət nümayəndələri iştirak ediblər.
Mərasimdə onların qəhrəmanlığından və vətənpərvərliyindən söz açılıb. Daha sonra onlarla bağlı xatirələrini bölüşüblər. Məktəblilər ədəbi-bədii kompozisiyalarla çıxış ediblər.
S.Abdurrəhmanlı və Ə.Eyvazov Füzuli istiqamətində döyüş tapşırığının yerinə yetirilməsi zamanı şəhid olublar. S.Abdurrəhmanlı ölümündən sonra "Vətən uğrunda", "İgidliyə görə" və "Füzulinin azad olunmasına görə" medallarıı ilə, Ə.Eyvazov isə "Vətən uğrunda" və "Cəbrayılın azad olunmasına görə" medalları ilə təltif edilib.
R.Rüstəmov Tərtər (keçmiş Ağdərə rayonu) istiqamətində gedən döyüşlərdə şəhid olub. Azərbaycan Milli Ordusunun yaradılmasında fəal iştirak etmiş məşhur sərkərdə, general-mayor Tərlan bəy Əliyarbəyovun nəticəsidir. R.Rüstəmov ölümündən sonra "Vətən uğrunda" və "Laçının azad olunmasına görə" medalları ilə təltif edilib.
