Bakıda qanunsuz ağac kəsimi ilə bağlı araşdırmalar aparılıb. Bu haqda bu gün, 7 fevral tarixində Bakuplus.az Ekologiya Nazirliyinə istinadən xəbər verir.
Məlum olub ki, paytaxtın bir sıra ərazilərində qanunsuz ağac kəsimi qeydə alınıb və təbiətə ümumilikdə 50.550 manat məbləğində ziyan dəyib.
Həmin ərazilər aşağıdakı kimidir:
- Sabunçu rayonu, Bakıxanov qəsəbəsi, Aşıq Alı küçəsində yerləşən “Memarlıq Şəhərciyi-2021” MMC-nin istifadəsində olan torpaq sahəsi;
- Babək prospekti, 37 ünvanında yerləşən “Efendiler Motors” MMC-nin istifadəsində olan ərazi;
- Nəsimi rayonu, H.Əliyev, 1d ünvanında yerləşən binanın qarşısı;
- Nərimanov rayonu, Təbriz, Əliəşrəf Əlizadə və Əliağa Vahid küçələrinin kəsişməsi;
- “Qala Qaya” MTK-nın tikinti sahəsində, eləcə də Nərimanov rayonu, Aşıq Molla Cümə küçəsi, 11 ünvanında qeyri-yaşayış obyektinin tikinti ərazisi;
- Hövsan qəsəbəsi, İ.Əhlimanov küçəsində yerləşən “7 gözəl” parkının ərazisi.
Aşkar olunan faktlarla bağlı akt tərtib edilib. Toplanmış sənədlər Azərbaycan Respublikasının Baş Prokurorluğuna göndərilib.
