Gələn il, martın 29-dan 31-dək Bakıdakı Milli Gimnastika Arenasında ilk dəfə bədii gimnastika üzrə Avropa Kuboku keçiriləcək. Bu haqda bu gün, 15 dekabr tarixində Bakuplus.az Azərbaycan Gimnastika Federasiyasına istinadən məlumat verir.
Yeni formatda təqdim olunacaq yarış proqramına “çarpaz-qarşılaşmalar” salınıb, yəni idmançılar finala yüksəlmək üçün püşkatma əsasında birbaşa bir-biri ilə mübarizə aparacaqlar.
Yarışda böyüklər və gənclər arasında çoxnövçülük, komanda hesabı və fərdi proqramda final yarışları keçiriləcək.
Yarışda yüksək yerlər tutan idmançılar mükafatlandırılacaqlar. Kubokda Beynəlxalq Gimnastika Federasiyasına üzv olan bütün ölkələr iştirak edə bilər.
