Piyada yollarının olmaması vətəndaşların gediş-gəlişinə maneə olmaqla yanaşı, həm də böyük təhlükə mənbəyidir. Belə ki, piyada yolundan istifadə edə bilməyən vətəndaşlar magistral yolun kənarı ilə getmək məcburiyyətində qalırlar və bu da bəzən ölümlə nəticələnir. Bu haqda bu gün, 21 dekabr tarixində Bakuplus.az AzTV-yə istinadən məlumat verir.
Piyada yolları, xüsusilə fiziki məhdudiyyətli insanlar üçün olduqca vacibdir. 12 ildir həyatı fiziki məhdudiyyətlə davam edən Aytac Həziyevanın hərəkətini çətinliyə salan piyada yollarının olmamasıdır.
“Piyada yollarının olmaması həm fiziki məhdudiyyətli insanlar üçün, həm eşitmə məhdudiyyətli insanlar üçün, xüsusilə də yeriyən insanlar üçün çox böyük problemdir. Bir çox yerlərdə piyada yolu olmur, ona görə də biz avtomobil yolundan keçirik. Bu da çox böyük qəzalara səbəb olur. Mənim fiziki məhdudiyyətli olmağım mənim xəyallarıma, həyatıma əngəl deyil, amma bu şəraitsiz yollar, təəssüf ki, bizim gündəlik həyatımıza böyük maneə olur”, – deyə gənc xanım şikayətini bildirib.
Nəqliyyat üzrə ekspert Rauf Ağamirzəyevin sözlərinə görə, dünya təcrübəsində mikromobillik vasitələrin, piyada infrastrukturunun inkişafı birinci mərhələdə görülür, yəni şəhər insana uyğun qurulur. İnsanın daha rahat hərəkət etməsi üçün piyada, velosiped, skuterlə hərəkət etmə, ayrılmış avtobus zolağı ilə hərəkət edən ictimai nəqliyyatın təşkili kompleks şəkildə olmalıdır. Amma ilk mərhələdə məhz piyada infrastrukturu daha tez və daha az xərclə başa gələn həldir.
Səkilər avtomobil yolları tikilərkən əvvəlcədən nəzərə alınır, razılaşdırılır və icrasına başlanılır. Nəzarət isə vaxtilə BNA-da idi. BNA-nın səlahiyyətləri hazırda Azərbaycan Yerüstü Nəqliyyat Agentliyində olduğu üçün sözügedən qurumdan bildirildi ki, piyada yollarına nəzarət qurumun səlahiyyətlərinə daxil deyil. Məsuliyyəti hansı qurumun daşıdığı hələ ki açıq sualdır.
