Təzə kran alırsan, amma tezliklə sıradan çıxır. Bəs bu problemin səbəbi nədir? Bakuplus komandası bu problemin səbəbini ATV reportajının köməyi ilə axtarıb.
“Azərsu” ASC-nin Mətbuat Xidmətinin rəhbəri Anar Cəbrayıllı məsələnin bilavasitə keyfiyyətsiz materiallardan qaynaqlandığını bildirir.
“Bununla bağlı bizə də tez-tez müraciətlər olur. Ümumiyyətlə, qeyd eləmək istəyirəm ki, su kranlarında ərpin yaranması, əsasən, isti sudan istifadə olunanda baş verir. Əgər o krandan soyuq su istifadə olunursa, onda heç vaxt ərp olmur. Ərp yalnız distillə olunmuş sularda əmələ gəlir. Amma kranların, sanitar qovşağında istifadə olunan digər cihazların sıradan çıxmasının əsas səbəbi ərplər yox, həmin cihazların, avadanlıqların ucuz və keyfiyyətsiz olması ilə bağlıdır”, - Cəbrayıllı deyib.
Ustalar bildirirlər ki, vətəndaşlar kranların dəyişilməsi üçün tez-tez onlara müraciət edirlər. Bu səbəbdən ustalar filtrlərdən istfadə etməyi və binaların su çənlərini tez-tez təmizləməyi məsləhət görürlər.
Kranları sıradan çıxaran digər bir məqam onların baş hissəsinin müntəzəm tərpənməsidir. Əsasən, mətbəxdə iş görərkən su kranlarının sağa-sola fırlanması onların xarab olmasına gətirib çıxarır.
Ucuz materiallardan hazırlanan kranlar daim su ilə təmasda olduğundan uzun ömürlü olmur. Bu baxımdan keyfiyyətli məhsullara üstünlük vermək olduqca vacibdir.
