Azərbaycan Dövlət Pedaqoji Universitetinin (ADPU) əməkdaşı tələbələrə yeməkxanada kitab oxumağı qadağan edir. Bu barədə Azərbaycan Universitetləri Facebook hesabında dərc olunan paylaşımda deyilir. Bu haqda bu gün, 13 oktyabr tarixində Bakuplus.az məlumat verir.
Verilən məlumata görə, artıq üç gündür ki, aşağıdakı videoda çəkilən şəxs universitetin əsas binasındakı yeməkxanaya dərsliklərlə gələn tələbələri oradan qovur. Səbəb isə yeməkxanada oturacaqların az olmasıdır.
İddia olunur ki, ADPU-nun əməkdaşı kitab sadəcə masanın üstündə olsa belə, tələbələri kobud şəkildə yeməkxanadan çıxarır. Vurğulanır ki, bufetdən ən çox qızlar qovulur.
ADPU-dan verilən açıqlamada bildirilir ki, tələbələrin narazılığı dərslərə, imtahanlara hazırlaşmaq üçün onların oxu zalına göndərilməsi, bufetdə oturmalarına qadağa qoyulmasından ibarətdir. Universitetin nümayəndəsi qeyd edib ki, universitetin professor-müəllim və tələbə heyətindən dəfələrlə şikayət daxil olub ki, hər hansı qida qəbul etmədikləri halda yeməkxanadakı yerləri həddən artıq məşğul edən tələbələr var və buna görə də digər müəllim və tələbələr yeməkxanadan istifadə edə bilmirlər.
Eyni zamanda universitetdə tələbələr üçün Kitabxana-İnformasiya Mərkəzi nəzərdə tutulub. Mərkəzdə ümumi oxu zalından əlavə, hermetik arakəsmələrlə ayrılan və səskeçirməyən bir neçə müzakirə otağı da var. Bu otaqlarda təkcə kitab oxumaq deyil, internetə qoşulmaq, təqdimatlar etmək üçün də hər bir şərait var və burada bir neçə tələbə rahatlıqla müzakirə apara bilər.
Həmçinin mərkəzdə tələbələrin rahatlıqla çay-qəhvə və qəlyanaltı ala və müzakirələr apara biləcəkləri minikafe də fəaliyyət göstərir.
