Marketlərdə polietilen paketlərlə bağlı qadağalar effektivdirmi? Bu haqda bu gün, 14 fevral tarixində Bakuplus.az ARB-yə istinadən xəbər verir.
Artıq 1 ildir ki, qalınlığı 15-50 mikron olan polietilen torbalar əhaliyə 3-5 qəpiyə satılır. Məqsəd ekologiyanın çirklənməsinin qarşısını almaq idi. Atılan addımlar öz töhfəsini verirmi?
Mütəxəssis Emin Ələkbərlinin sözlərinə görə, marketlərdə artıq əvvəlki kimi, ehtiyac oldu-olmadı əl atıb paket götürənlər azalıblar. Bu da atılan addımların effektiv olduğunu göstərir.
Satıcılar isə bunun tam tərsini deyirlər. Onlar müştərilərin 80-85%-nin paket aldıqlarını vurğulayırlar.
“Gün ərzində 600-650 arası müştəri yola salırıq. Onların əksəriyyətinə paket veririk”, – deyə satıcılar bildirirlər.
Mütəxəssislərin fikrincə müştərini polietilen torbalardan çəkindirmək üçün ticarət mərkəzləri də səy göstərməlidir.
“Öncə təbliğat-təşviqat məsələlərinə daha ciddi yanaşmalıyıq. Deyək ki, marketdə həmin o paketlə yan-yana kağız paket də qoyula bilər, hər hansısa reklamlar etmək lazımdır, bir yazı yazmaq lazımdır, bir şəkil qoymaq lazımdır”, – deyə Emin Ələkbərli qeyd edib.
Antiinhisar və İstehlak Bazarına Nəzarət Xidmətinin mütəxəssisi isə deyir ki, bəzi alıcıların və satıcıların ifadələri əsas götürülmür. Əsas olan aparılan araşdırmaların nəticələri və konkret statistikadır:
“Polietilen torbaların satışında əhəmiyyətli dərəcədə azalmalar müşahidə olunur. Bu, təqribən 50%-ə qədər azalmalar deməkdir. Bundan əlavə, rəqəmlərin azalması ticarət şəbəkəsinin sayının artmasına baxmayaraq, istehlak bazarının həcminin artmasına baxmayaraq, bu fonda müşahidə olunur”.
