Bakının Nəsimi rayonu 3-cü mikrorayondakı Cavadxan, 24 ünvanında yaşayan sakinlər yolun hər iki tərəfində yaranan sıxlıqdan şikayət edirlər. Tıxaclar artıq ara məhəllələrdə də başlayıb. Bu haqda bu gün, 25 iyul tarixində Bakuplus.az AZTV-yə istinadən məlumat verir.
Əvvəllər günün pik saatlarında yaranan vəziyyətin indi konkret saatı bəlli deyil, ərazidə rahat hərəkət olduqca çətinləşib. Sakinlər deyirlər ki, avtomobillərin sayına görə, nə keçmək olur, nə də dayanmaq, üstəlik yolun sağ və sol tərəfində dayanma-durmanı qadağan edən nişanlar da yoxdur.
Sadalanan problemlərə paytaxtın digər bir ərazisində də rast gəlinir. Nizami rayonu 8-ci km bazarının ərazisində eyni vəziyyət müşahidə edilir. Yolun hər iki tərəfindəki parklanmalar gediş-gəlişə ciddi maneə törədir.
“Nəzərə almaq lazımdır ki, dayanma-durmanın qadağan edildiyi yerdə nəqliyyat vasitəsini saxlamaq qanunsuzdur və belə olan təqdirdə həmin sürücü barəsində Azərbaycan Respublikası İnzibati Xətalar Məcəlləsinin 346.1 maddəsinə uyğun olaraq, 20 manat məbləğində cərimə də nəzərdə tutulub”, – Bakı şəhər DYP İdarəsinin bölmə rəisi Toğrul Nəsirli bildirib.
Görünən odur ki, bəzən cərimələr belə nəticəyə təsir göstərmir. Bəs başqa nə etmək olar?
Nəqliyyat üzrə ekspert Elməddin Muradovun sözlərinə görə, problemli küçələrdə hərəkətin təşkili ilə bağlı müəyyən addımlar atılmalıdır. Bunun üçün yol polisi Yerüstü Nəqliyyat Agentliyi (AYNA) ilə birlikdə əməkdaşlıq etməklə bu tipli yolları da nəzarətdə saxlamalıdır.
Məsələ ilə bağlı AYNA-dan bildirildi ki, sözügedən məsələ araşdırılıb, ərazidə monitorinq aparılıb, dayanma-durma nişanının quraşdırılması müvafiq dövlət strukturu ilə razılaşdırılıb. Yaxın günlərdə problem müsbət həllini tapacaq.
