Qarlı hava şəraiti ilə əlaqədar paytaxtdan digər şəhərlərə gedən taksilərin qiymətləri artıb. Bu haqda bu gün, 16 yanvar tarixində Bakuplus.az ARB Xəbər-ə istinadən xəbər verir.
Hava şəraiti ilə əlaqədar Bakı Beynəlxalq Avtovağzalından Qəbələ, İsmayıllı və Naxçıvan istiqamətlərinə gedişlər taxirə salınmışdır. Lakin vətəndaşların sözlərinə görə, həmçinin digər bölgələrə də avtobus tapmaq çətin olub. Bu səbəbdən onlar taksi ilə getməyə məcbur olublar.
Vətəndaşların verdiyi məlumatlara əsasən, taksi sürücüləri qiymətləri artırıblar.
“8 manatlıq yol üçün 13 manat istədilər, buna görə sərf eləmədi burda durub maşın gözləyirəm”, - deyə vətəndaşların biri bildirib.
Taksi sürücüləri də qiymət artımını təsdiqləyiblər. Qiymətin artım səbəbi yolların buz bağlaması olub. 15 manatlıq yollar buz bağladıqdan sonra 20 manat olub. 3 saatlıq yolu isə 5-6 saata gedirlər.
Azərbaycan Yerüstü Nəqliyyat Agentliyindən (AYNA) deyildi ki, artıq taxirə salınan reyslər bərpa olunub. Hazırda rayonlar istiqamətində sərnişindaşımada hər hansı problem müşahidə edilmir.
AYNA-nın mətbuat katibi Tural Orucovun verdiyi məlumata görə, yerüstü nəqliyyat agentliyinin monitorinq mərkəzi vasitəsi ilə xəttə çıxan bütün avtobuslara real vaxt rejimində nəzarət olunur.
Əlavə olaraq, qurumdan bildirildi ki, ümumilikdə hazırda Bakıdan bölgələrə sərnişin axını zəifdir. Amma buna baxmayaraq, bütün istiqamətlər üzrə reyslər təşkil edilir.
