Sabunçu rayonu, Ramana qəsəbəsi, Gülçülük yaşayış massivində kanalda natəmizlik hökm sürür. Bu haqda bu gün, 16 aprel tarixində Bakuplus.az ATV-yə istinadən xəbər verir.
Adıçəkilən ərazidə kanala birbaşa çirkab su və tullantılar atılır. Bu da həm üfunət, həm də antisanitariyaya səbəb olur. Bildirilir ki, antisanitariya massivdə kanalizasiya şəbəkəsinin olmaması və kanalın vaxtında təmizlənməməsi səbəbindəndir.
“Yoldan keçənlər əlindəki hər şeyi atırlar ora. Havalar isti olandan sonra dayanmaq mümkün olmayacaq”, – deyə sakinlər şikayət edirlər.
Abşeron suvarma sistemləri idarəsinin baş mühəndisi bildirib ki, kanal sakinlər tərəfindən zibillənir:
“Kanalın lildən təmizlənmə işləri var. İldə biz onu 2 dəfə təmizləyirik. Amma nasos və elektrik mühərrikini qorumaq üçün həmin ərazini biz 10 gündən bir təmizləməyə məcburuq”, – deyə o qeyd edib.
“Azərsu” ASC-dən isə dedilər ki, Ramana qəsəbəsinə gələcək mərkəzləşdirilmiş kanalizasiya sistemi qurulacaq. Həmin vaxta qədər sakinlər yaşadıqları sahələri təmiz saxlamalıdırlar.
