Paytaxtın Sabunçu rayonu, Ramana qəsəbəsi, “Südçülük sovxozu” adlanan ərazidə sakinlər içməli su ilə bağlı çətinlik çəkirlər. Bu haqda bu gün, 15 iyul tarixində Bakuplus.az Xəzər Xəbər-ə istinadən məlumat verir.
Sakinlərin sözlərinə görə, 15 gündən çoxdur içməli su verilmir. Sakinlər qonşu kənddən bidonlarla su gətirməyə məcbur qalırlar.
“Kimin imkanı çatır, çən alır, su doldurur. Mən kasıb adamam, evdə də 87 yaşlı xəstəm var”, - deyə sakinlərdən biri şikayət edir.
“Azərsu” ASC məsələdən xəbərdar olduqlarını, qıtlığa səbəbin ərazidə su istifadəçilərinin sayının artması olduğunu bildiriblər. Problem aradan qaldırılana qədər sakinlər üçün avtomobillərlə su veriləcəyi əlavə olunub.
