Bakının Səbail rayonu 91 saylı uşaq bağçasında qanunsuz pul yığılıb. Bu haqda bu gün, 16 fevral tarixində Bakuplus.az ATV News-a istinadən xəbər verir.
Sözügedən bağçanın təsərrüfat müdiri Zibeydə Quliyeva uşaqların valideynlərindən pul tələb edirdi. O, qeydiyyata görə 150 manat, sonra isə aylıq ödəniş üçün 50 manat pul götürüb.
Sakinlərin sözlərinə görə, onlar uşaqlarının xətrinə bağçaya ödəniş etməyə razı olublar.
“Mağazaların birində eşitmişəm ki, bəzi valideynlər pul olmadığına görə uşaqları bağçaya qoya bilmirlər. Onlardan 300-400 manat pul tələb edirlər”, – deyə sakinlərdən biri bildirib.
Məsələ ilə bağlı Bakı şəhər Təhsil İdarəsindən bildirildi ki, Zibeydə Quliyeva əmək fəaliyyətində yol verdiyi kobud nöqsanlara görə işdən çıxarılıb. Bağçanın müdiri Nabat Əliyevaya isə əmək məcəlləsinə əsasən, sonuncu xəbərdarlıqla şiddətli töhmət verilib.
