Kiçik mühərrikli avtomobil sahibləri mülklərini icbari qaydada sığortalamaq istəyəndə qarşı tərəfdən yox cavabı eşidirlər. Bu haqda bu gün, 9 yanvar tarixində Bakuplus.az ARB Xəbər-ə istinadən məlumat verir.
Burada söhbət təkcə ucuz avtomobillərdən getmir – 20.000-30.000 manata alınmış kiçik mühərrikli minik maşınları da az deyil. Sığorta agentlikləri isə deyirlər ki, yalnız mühərrik həcmi böyük olan maşınlar sığortalanır. Bu, həm benzinlə işləyən, həm də hibrid avtomobillərə aiddir.
Hazırda mühərrik tutumu kiçik olan nəqliyyat vasitələrini sığortalamaqda maraqlı görünməyən tərəf sığorta şirkətləri deyil, agentliklərdir. Çünki indiyədək onlar müəyyən məbləğ müqabilində xidmət göstəriblər, xərcləri də sığorta şirkətləri qarşılayıb. Amma Mərkəzi Bankın yeni qərarı ilə artıq mühərrik tutumu kiçik olan nəqliyyat vasitələrini sığorta agentlikləri deyil, birbaşa şirkətlər özləri edir. Bunu sığorta eksperti İlkin İbrahimov izah edib.
“Sığorta şirkətləri 2 və yaxud da 2,5 mühərrik həcminə kimi avtonəqliyyat vasitələrinin mülki məsuliyyətinin icbari sığortasının növü üzrə siğortalanmasını özlərinin edəcəklərini bildirirdilər və sığorta agentləri bunları həyata keçirərsə, onlara müəyyən qədər faiz verilirdi. Həcmi 2,5 litrdən daha yuxarı mühərrikləri olan avtonəqliyyat vasitələri ilə bağlı bu məsələdə sığorta şirkətlərinin agentlikləri arasında müqavilələr mövcuddur. Sığorta şirkətləri onlara müəyyən komisiya muzdu verir, sığorta agentləri də bu məsələni daha yaxşı formada həyata keçirmək istəyirlər”, – deyə ekspert əlavə edib.
Ekspert onu da bildirdi ki, sığorta şirkətinin elektron səhifəsinə daxil olmaqla heç bir problemlə qarşılaşmadan ən kiçik mühərrik həcmli avtomobili belə sığortalamaq mümkündür.
