“BakuBus” MMC-yə məxsus 32 saylı marşrut ilə hərəkət edən avtobusun sürücüsü sərnişinin ünvanına istifadə etdiyi nalayiq ifədələrə görə işdən çıxarılıb. Bu haqda bu gün, 26 oktyabr tarixində Bakuplus.az Oxu.az-a istinadən məlumat verir.
Sosial şəbəkələrdə “BakuBus”ın sürücüsü ilə sərnişin arasında mübahisənin görüntüləri yayılıb. Belə ki, 32 saylı marşrutda baş verən mübahisə zamanı sürücü avtobusu saxlayıb və sürməyəcəyini bildirib.
“Get, kimə şikayət edirsən, et”, – deyən sürücünün hərəkəti təyinat yerinə gecikən sərnişinlərin narazılığına səbəb olub.
Məsələ ilə bağlı “BakuBus” MMC açıqlama verib. MMC-dən bildirilib ki, şirkətin istismarda olan 32 saylı marşrut xəttinin avtobus sürücüsünün yayılan videogörüntüləri hərtərəfli araşdırılıb:
“Sürücünün davranışının qaydalar çərçivəsində olmadığı öz təsdiqini tapdı. Sürücü əmək qanunvericiliyinə əsəsən, işdən azad edilib.
Bu kimi halların qarşısını almaq üçün sərnişinlərlə əlaqə imkanlarımızı genişləndirmişik ki, anında reaksiyaları ala bilək. Xidmət keyfiyyətinin daha da yüksək səviyyəyə çatdırılması baxımından keyfiyyətə nəzarət mütəxəssisləri gündəlik əsasda bilavasitə xidmət zamanı keyfiyyətin monitorinqini həyata keçirir və sərnişinlərin yanında olaraq rəylərini öyrənirlər”.
