Sabunçu qəsəbəsi, Qəzənfər Musabəyov küçəsində yaşayan sakinlər su problemi yaşayırlar. Bu haqda bu gün, 2 mart tarixində Bakuplus.az Xəzər Xəbər-ə istinadən məlumat verir.
Vətəndaşlar 10 ildən çoxdur ki, içməli suyu qrafiklə alırlar. Dediklərinə görə, su problemindən qurtulmaq üçün öz vəsaitləri hesabına 2012-ci ildə su xətti də çəkdiriblər.
“Öz hesabımıza su çəkmişik. Bir neçə ay su normal gəldi, sonra yenə bizə su gəlmədi. Su zəif və saatla gəlir”, - deyə şikayətçi bildirib.
Qəsəbədəki evlərin təxminən 100-120 yaşı var. Sakinlər deyirlər ki, bura Bakının ən köhnə qəsəbəsi olsa da, ətraf ərazilərdə su fasiləsiz verilir.
Təxminən 10-12 ailənin yaşadığı ümumi həyətlərdə sakinlər su problemini aradan qaldırmaq üçün su mühərriki də alıblar. Hər bir evin ayrıca su çəni də var. Çəkdikləri bu xərcin də xeyri olmayıb.
Sakinlərin içməli su probleminin həlli ilə bağlı Sabunçu rayon Sukanal İdarəsindən qeyd olundu ki, bu ünvanda mərkəzləşmiş şəbəkə mövcud deyil, primitiv xətlər quraşdırılıb. Şəbəkələrə verilən suyun həcmi azaldıqda, həmin ünvanda problem daha da qabarıq formada üzə çıxır. Ərazidə şəbəkənin yenidən qurulması isə “Azərsu” ASC-nin perspektiv layihə planına salınıb. Son iki gündə bir çox ərazilərə su verilməməsinə gəlincə isə qurumdan bildirildi ki, bu mərkəzləşmiş magistral su xətti ilə bağlıdır. Məsələ artıq həll edilib və əhalinin su ilə təminatında heç bir problem olmayacaq.
