Bakının Sabunçu rayonunun eyniadlı qəsəbəsi, Əzim Əzimzadə küçəsində sakinlər məhəllədaxili yolların bərbad vəziyyətindən şikayətçidirlər. Bu haqda bu gün, 30 mart tarixində Bakuplus.az ATV Show-ya istinadən xəbər verir.
Sözügedən ərazidə asfalt örtüyü olmadığından yağıntılı havada hərəkət xeyli çətinləşir, kələ-kötür, palçıqlı yollardan keçmək mümkün olmur. Sakinlərin sözlərinə görə, nə təcili yardım gəlir, nə də taksi. Bunun səbəbi isə ərazidəki su xəttinin qəzalı olması və suyun torpağı korlamasıdır.
“Uşaqlarımız məktəbə çatana qədər üst-başları palçıq olur. Bu yolları öz vəsaitimizlə asfalt qırıntıları töküb düzəltik. İndi isə yollar pis vəziyyətdədir. Taksilər qısa yola görə əlavə 10 manat istəyirlər”, – deyə sakinlər şikayət edirlər.
Sabunçu qəsəbə nümayəndəsinin müavini Ceyhun Abbasovdan verilən məlumata görə, rayonun bütün qəsəbələrində yolların asfaltlanması ilə bağlı artıq müraciət olunub.
Su xəttindəki qəza ilə bağlı Sabunçu rayon Sukanal İdarəsi xəbərdardır. Problem dərhal nəzarətə götürülüb və həlli üçün addımlar atılıb.
