Bakının müxtəlif prospekt və küçələrində olan yeraltı keçidlərin eskalatorlarının işləməməsi artıq adi hal alıb.
Bakuplus.az xəbər verir ki, sakinlərin ən çox narazılıq etdikləri isə şəhərin mərkəzində, Heydər Əliyev sarayının qarşısındakı əraziyə çıxmaq üçün istifadə edilən yeraltı keçiddəki eskalatorlardır. Bülbül prospekti 33-də yerləşən keçiddəki dörd eskalatorlardan yalnız biri işlək vəziyyətdədir. Bununla bağlı sakinlər redaksiyamıza videolar da göndərib. Görüntülərdən də göründüyü kimi eskalatorlar işləmir. İnsanlar, əsasən də yaşlılar bu vəziyyətdən çox əziyyət çəkir.
Məsələ ilə bağlı “Azərbaycan Avtomobil Yolları” Dövlət Agentliyinin Mətbuat xidmətinin rəhbəri Anar Nəcəfli ilə əlaqə saxladıq.
Anar Nəcəfli bildirib ki, sözügedən ərazidə, yəni Heydər Əliyev sarayının qarşısındakı piyada keçidində iki eskalator işləmir.
“Eskalatorların ehtiyat hissələri ölkəmizdə istehsal olunmur. Buna görə də xaricdən sifariş verilir. Xaricdən sifariş verilib gətirilməsi isə vaxt tələb edir. Amma artıq yaxın günlərdə ehtiyat hissələri gəlib çatacaq. Çatan kimi isə eskalatorlar qısa müddətdə işlək vəziyyətinə salınacaq” – deyə o əlavə edib.
Qeyd edək ki, sözügedən eskalatorlar illərdir fəaliyyət göstərmir.
