Qaradağ rayonu, Sahil qəsəbəsindən şəhər mərkəzinə gəlmək bəzən sakinləri əməlli-başlı xərcə salır. Sahildən şəhər istiqamətinə 149 saylı avtobus fəaliyyət göstərirdi. Sakinlər deyirlər ki, artıq bir neçə gündür həmin marşrut işləmir. Bu haqda bu gün, 7 aprel tarixində Bakuplus.az ATV Xəbər-ə istinadən məlumat verir.
Qəsəbədən 20-ci sahəyə hərəkət edən 149 saylı avtobus bir neçə gündür ki, fəaliyyət göstərmir. Sərnişinlər qəsəbədən şəhərə getmək üçün indi ancaq taksidən istifadə etməlidirlər. Bu da onlara baha başa gəlir.
Sahil qəsəbəsinin icra nümayəndəsi Əli Əliyev deyir ki, 149 saylı marşrut xəttində cəmi 1 avtobus fəaliyyət göstərir ki, bu da Sahil qəsəbəsinin sakinləri üçün çox azdır. Onun şəhərə gedib-qayıtması xeyli vaxt tələb edir. Marşrut xəttinə əlavə avtobusların buraxılması üçün aidiyyəti qurumlara müraciət olunub.
149 saylı marşrut xəttinin aid olduğu daşıyıcı şirkətdən bildirildi ki, Sahil qəsəbəsində qanunsuz fəaliyyət göstərən taksilərin sayı çox olduğundan sərnişinlər avtobusdan az istifadə edirlər. Hətta bəzi hallarda avtobus boş gedib-gəlir. Bu isə onlara sərf etmədiyindən həmin xətt üzrə yalnız 1 avtobus saxlayıblar. Amma sərnişinlərin müraciətini nəzərə alaraq sabahdan etibarən həmin xəttə 2 əlavə avtobus buraxılacaq.
Məsələ ilə bağlı BNA-dan isə bildirildi ki, qanunsuz sərnişindaşımaların mövcudluğu müntəzəm marşrut xətlərinin düzgün və səmərəli fəaliyyətinə ciddi maneələr yaradır. Qanunsuz sərnişindaşıma hallarının aradan qaldırılması üçün agentlik tərəfindən bir neçə dəfə müvafiq qurumlara müraciət edilib. Eyni zamanda 149 saylı müntəzəm marşrut xətti üzrə avtobus sayının sərnişin tələbatını düzgün tənzimlənməsi ilə bağlı daşıyıcı şirkətə də tapşırıqlar verilib.
