Masazır qəsəbəsi – “Memar Əcəmi” metro stansiyası marşrutu üzrə hərəkət edən avtobus sərnişinlərin narazılığına səbəb olub. Bu haqda bu gün, 24 yanvar tarixində Bakuplus.az İctimai TV-yə istinadən xəbər verir.
Sakinlərin sözlərinə görə, onlar hər gün 525 nömrəli avtobusları uzun müddət gözləməli olurlar. Gələn avtobusların çoxu isə dolu olur. Həmçinin onların bir hissəsi Zəngilan şəhərciyinə, cəmi bir neçəsi isə şəhərə tərəf hərəkət edir.
“Dəfələrlə avtobus nasaz vəziyyətdə olub, hamını dayanacaqda düşürdüblər. Həmçinin hər dayanacaqda çox dayanırlar deyə evlərimizə gec çatırıq”, – deyə sakinlər şikayət edirlər.
Daşıyıcı şirkətdən məsələ ilə bağlı bildirilib ki, problemdən xəbərdardırlar.
“Şirkət tərəfdən pik saatlarda xəttə 9 rezerv avtobus buraxılır və onların qrafikə uyğunlaşması üçün avtobuslar hər dayanacaqda 20-30 saniyə gözləməli olurlar”, – deyə şirkət qeyd edib.
Azərbaycan Yerüstü Nəqliyyat Agentliyinin (AYNA) mətbuat katibi Tural Orucov isə vurğulayıb ki, xəttə 17 avtobus buraxılıb və 8 dəqiqə intervalla sərnişinlərə xidmət göstərilir.
“Günün pik saatlarında Masazır qəsəbəsi, “Şamaxinka” adlanan ərazidə müşahidə edilən sıxlıq səbəbindən marşrut xəttində ləngimələr yaranır”, – deyə o əlavə edib.
Bir neçə gün öncə 525 nömrəli marşrut üzrə hərəkət edən avtobusun tamamilə sağ tərəfə əyilmiş vəziyyətdə hərəkət etməsi ilə bağlı videogörüntülər sosial şəbəkələrdə yayılmışdı.
