Bakının Suraxanı rayonu, Yeni Günəşli qəsəbəsi, D massivindəki 1 nömrəli binaya istilik verilmir. Bu haqda bu gün, 29 yanvar tarixində Bakuplus.az Xəzər Xəbər-ə istinadən xəbər verir.
Sözügedən ərazidə yaşayan sakinlər istilik sisteminin işləməməsindən narazıdırlar. Onların sözlərinə görə, istilik yoxdur, amma adlarına borc yazılır. Vətəndaşlar dəfələrlə məsələ ilə bağlı müraciət etsələr də, problem həll olunmur.
“Qarlı hava olan zaman ümumiyyətlə sistem sönür. Soyuqdan evə girmək mümkün olmur. Müraciət edəndə də deyirlər: “Korporativ binadır, gedin, probleminizi özünüz həll edin”, – deyə sakinlər şikayət edirlər.
“Azəristiliktəchizat” ASC-nin mətbuat katibi Elvin Basqallı bildirib ki, sözügedən binaların istiliklə bağlı problemi yoxdur. Həmin bina “Azəristiliktəchizat” ASC tərəfindən mərkəzləşdirilmiş qaydada istiliklə təmin olunur.
“Əgər hər hansı problem varsa, qaynar xətt vasitəsilə müraciət edə bilərlər. Dərhal araşdırıb dəstək göstərəcəyik”, – deyə o əlavə edib.
