Xətai rayonu NZS qəsəbəsinin sakinləri 32 nömrəli marşrut avtobusunun fəaliyyətindən narazıdır.
Bu barədə sakinlər Bakuplus.az redaksiyasına şikayət ünvanlayıb.
Bildirilib ki, avtobusların hərəkət qrafikində həddindən artıq gecikmə var:
“Neçə ildir ki, bu marşrut xəttindən istifadə edirik. Yetəri qədər adam da istifadə edir. Ancaq səhərlər işə, məktəbə getməkdə çətinlik çəkirik. Bu ərazidən 8 Noyabr prospekti istiqamətində işləyən bir avtobus var. O da bu vəziyyətdədir”.
Sakinlərin sözlərinə görə, əvvəllər 32 nömrəli marşrut üzrə böyük üç qapılı avtobuslar fəaliyyətdə olub. Ancaq COP29 ərəfəsində onları kiçik qabaritli avtobuslarla dəyişdiriblər.
“Əvvəllər gecikmə olsa da, heç olmasa avtobusa minə bilirdik. COP29-dan sonra onu da kiçik həcmli avtobuslarla əvəz etdilər. İndi həm gecikir, həm də dolu gəlir. Elə olur ki, sürücü dayanacaqda saxlamır. Deyir ki, yer yoxdur”, - deyə sakinlərdən biri bildirib.
Məsələ ilə bağlı Azərbaycan Yerüstü Nəqliyyat Agentliyinə (AYNA) sorğu göndərdik.
Agentlikdən sorğumuza cavab olaraq bildirildi ki, daha əvvəl həmin istiqamətdə işləyən 30 nömrəli avtobus barəsində də belə şikayətlər olunub və araşdırma nəticəsində gecikmələrin yaşanmadığı məlum olub:
“Bizə şikayət olundu ki, filan dayanacaqda və saat aralığında 35 dəqiqə gecikmə olub. Həmin günü kameraları açıb baxdıq və gecikmənin olmadığını, deyilən saat aralığında bir neçə avtobusun dayanacaqdan keçdiyinin şahidi olduq. Biz həmişə sərnişin rəyinə və şikayətlərə hörmət edirik. Amma bəzən fikirlər yanlış da ola bilir”, - deyə qurumdan bildirilib.
Bundan əlavə, agentlik əməkdaşı marşrutlara kiçik həcmli avtobusların buraxılması barəsində də danışıb.
Onun sözlərinə görə, depoda istər qırmızı, istərsə də yaşıl avtobus yoxdur:
“Avtobusların hər biri xətdədir. Həmin avtobuslar qarışıq şəkildə xətlərə paylanır. Onların böyüyü də, kiçiyi də var. 32 nömrəli marşrutlarda da sırf balaca deyil. Bu nömrədə həm 9 metrlik, həm də 12 metrlik avtobuslar fəaliyyət göstərir”.
