- Votsapa niyə cavab vermirsən axı?
- Səhərdən yenə işıqlarımızı söndürüblər, vay-fay yoxdur...
Bir sıravi Masazır sakini kimi bu xəbərə heç təəcüblənmədim. Bizim üçün hamısı bir qəbildəndir: dənizdə dalğa olar, payızda yağış yağar, sübhdə həyətlərdə xoruzlar banlayar, işıq tez-tez kəsilər, su günlərlə gəlməz, qaz verilişi qışın oğlan çağında dayandırılar... Odur ki, sıradan bir gün, sıradan bir hadisə. Artıq kiməsə ağız açmağa, hansısa qurumun “qap-qaynar” xəttinə zəng vurmağa heç bir Masazır sakinin nə taqəti var, nə həvəsi. Onsuz da növbətçi bəhanələri əvvəlcədən eşidəcəyimizi bilirik: “Qəza baş verib, briqada ərazidədir”, “Şikayətiniz aidiyyəti üzrə ünvanlandı”, “Ola bilməz! O əraziyə su verilir!”... Və, əlbəttə ki, “hazırda bütün operatorlar məşğuldu”.
Mən heç indi də, əsl Masazır sakini kimi reaksiya verməzdim: sönüb sönüb də, yəqin axşama, uzağı səhərə işıq gələr. Amma gözümə saytların birində belə bir xəbər sataşdı: “Azərenerji" ASC noyabrın 11-22-də Bakıda keçiriləcək BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ilə əlaqədar tədbirin və ümumilikdə Bakı şəhəri başda olmaqla ölkənin fasiləsiz və dayanıqlı elektrik təchizatının təmin edilməsi üçün gücləndirilmiş iş rejiminə keçir”. Və daxilimdəki əyləc sistemi tutmadı. İstədim “Azərenerji”nin timsalında bütün kommunal xidmətlərin rəhbərlərinə, mühəndis-texniki heyətinə, fəhlələrinə, sürücülərinə, xadimələrinə, mühafizəçilərinə müraciət edim, xahiş edim... Yox-yox, istədim var gücümlə hayqırım: GÜCƏNMƏYİN! Siz Allah – GÜ-CƏN-MƏ-YİN! Lazım deyil! Ölkədə təşkil olunacaq istənilən tədbirdən, qarşıdan gələn istənilən bayramdan öncə mətbuatda belə əttökən bəyanatlarla çıxış edirsiniz. Heç utanırsınız? Heç qızarırsınız? Azərbaycanın sıravi vətəndaşı kimi deyirəm bir daha: zaman-zaman gücənmək lazım deyil, vicdanla, namusla, kişi kimi öhdənizə düşən vəzifəni aramla, sakit, özünü gücə salmadan həyata keçirmək lazımdı. Belə etmək lazımdı ki, vətəndaş qışda qazsız, yayda susuz, gecənin qaranlığında işıqsız qalmasın. Hərçənd, Masazır sakini kimi qışda da susuz, gündüz də işıqsız, yayda da qazsız qalmağa adət etmişik. Amma yenə də... Müraciət etdim. Bəlkə da, bəlkə hardasa nəsə tərpəndi. Ümid sonuncu ölür axı. Düzdür, can verməkdədi bu ümid, can üstədir. Ancaq həyat işartıları verir. Gözləyirik. Hamımız gözləyirik. Xüsusən də Masazır sakinləri...
P.S. Bu arada şad xəbər aldım: işıq 4,5 saatdan sonra verildi. Şükür, ay Allah! Bu dəfə yaxşı qurtardıq!
P.P.S. Yeri gəlmişkən: 3 gündür suyumuz da verilmir. Yəqin “Azərsu” da gücənmək ərəfəsindədir.
Vüsal Əliyev
