Dünən axşamdan etibarən WhatsApp qruplarında guya Bakıda gözlənilən güclü zəlzələ ilə bağlı mesajlar yayılır. Bu haqda bu gün, 7 fevral tarixində Bakuplus.az məlumat verir.
“Rubin Burrell, təcrübəli amerikalı geoloq: Yaxın günlərdə Bakının mərkəzində güclü zəlzələ baş verəcək. “Geoloji xəritələr və bu gün Türkiyədə baş verən zəlzələ ilə eyni vaxtda yer plitələrinin hərəkətinin tədqiqi göstərir ki, 6.9 bal gücündə zəlzələ yarada bilən Bakı yarması aktivləşib”, – deyə Burrell bildirib”, - məlumatda deyilir.
Bu mesaj “Daily Express” qəzetinin səhifəsindən çəkildiyi iddia edilən “skrinşot”la müşayiət olunur. Lakin bu məlumat həqiqətə uyğun deyil.
Google axtarış sistemində adi yoxlama zamanı məlum olur ki, Bakı yarması kimi bir geoloji anlayış yoxdur, xəbər portalının saytında belə bir xəbər yoxdur və bu adda alim da yoxdur.
Azərbaycan Milli Elmlər Akademiyası nəzdində Respublika Seysmoloji Xidmət Mərkəzinin rəhbəri Qurban Yetirmişli dünən keçirdiyi mətbuat konfransında bildirib ki, Türkiyədə baş verən zəlzələnin episentri ilə ölkəmiz arasında məsafə təxminən 700-800 km-dir. Ona görə də Türkiyədəki zəlzələdən gələn seysmik dalğalar Azərbaycandakı zəlzələlərin ocaqlarını oyada bilmir. Qurban Yetirmişli onu da qeyd edib ki, Azərbaycanda fəlakətli zəlzələ gözlənilmir.
