Əməkdar artist Cabir İmanovun vəfatından 1 il ötür.
Cabir İmanov ötən ilin oktyabrında idman zalında infarkt keçirərək vəfat edib. O, Yasamal rayonundakı "Qurd qapısı" qəbiristanlığında dəfn olunub.
Qeyd edək ki, Cabir İmanov 22 iyun 1976-cı ildə Bakıda anadan olub. O, iqtisad elmləri doktoru Qorxmaz İmanovun oğlu, aktyor Tahir İmanovun qardaşı, bəstəkar Süleyman Ələsgərovun nəvəsidir.
1983–1993-cü illərdə 189 saylı məktəbdə təhsil alan Cabir İmanov 1993-cü ildə Azərbaycan Dövlət İqtisad İnstitutuna qəbul olub və 1997-ci ildə həmin institutu bitirib. 1997–1998-ci illərdə Daxili Qoşunlarda həqiqi hərbi xidmət keçib.
1999-cu ildə Bakı Dövlət Universitetinin Hüquq fakültəsinə qəbul olub və 2003-cü ildə universiteti bitirib. İqtisadçı və hüquqşünas ixtisaslarına yiyələnən İmanov 1999–2018-ci illərdə Daxili İşlər Nazirliyində müxtəlif vəzifələrdə çalışıb və polis polkovnik-leytenantı rütbəsinə qədər yüksəlib. O, daha sonra DTX Mədəniyyət Mərkəzinin rəisi vəzifəsində fəaliyyət göstərib.
Cabir İmanov 1992–2001-ci illərdə "Parni iz Baku" KVN komandasının üzvü olub. 2015-ci ildə "Əməkdar artist" fəxri adına layiq görülüb, 2021-ci ildə isə "Tərəqqi" medalı ilə təltif olunub.
İki dəfə ailə həyatı quran mərhum sənətçinin 4 övladı var.
