Bakının Yasamal rayonu, İnşaatçılar prospektində piyadalar keçidlərin olmaması ilə bağlı şikayətçidirlər. Bu haqda bu gün, 26 mart tarixində Bakuplus.az İctimai TV-yə istinadən xəbər verir.
“Statistika dairəsi” adlanan ərazidə sakinlər avtobus dayanacağına çatmaq üçün bir neçə yüz metr məsafə qət edərək yolu keçməlidirlər. Bu səbəbdən də avtobusu qaçırmamaq üçün onlar öz həyatlarını təhlükəyə atırlar.
“Axşam saatlarında avtomobillərin çox olmasına görə yolu keçmək mümkün olmur. Yaxınlıqda olan keçidlər də dayanacaqdan uzaq yerləşir. Burada yerüstü və ya digər növ keçid olsa, daha rahat olardı”, – deyə sakinlər şikayət edirlər.
Azərbaycan Yerüstü Nəqliyyat Agentliyindən (AYNA) bildirildi ki, sözügedən ərazidə 4 müxtəlif yerdə piyada keçidi mövcuddur. Piyada keçidlərinin arasında isə məsafə 150-200 m olmalıdır.
