Bazar günündən etibarən Bakı-Sumqayıt marşrutu üzrə ekspres avtobuslar hərəkət etməyə başlayıb. Lakin ictimai nəqliyyatdan istifadə edən sərnişinlər problemlərlə rastlaşdıqlarını bildirirlər. Bu haqda bu gün, 24 yanvar tarixində Bakuplus.az Bizim.Media-ya istinadən məlumat verir.
Vətəndaşların sözlərinə görə, intervalın 11 dəqiqə olacağı qeyd edilsə də, avtobuslarda oturacaqların hamısı dolu olmamış yola çıxılmayacağı deyilir. Bununla yanaşı, ödəniş kartını oxuma cihazlarının işlək olmadığı deyilir. Bu səbəbdən sərnişinlər növbədə dayanan digər avtobuslara göndəriliblər.
Azərbaycan Yerüstü Nəqliyyat Agentliyinin (AYNA) mətbuat katibi Tural Orucov sözügedən iradları təkzib edib. AYNA-nın sözçüsü bildirib ki, 14 ekspres avtobus 11 dəqiqə intervalla yola düşür.
Kart oxuma cihazlarına gəlincə, Orucov qeyd edib ki, cihazların yoxlanışı reysdən öncə həyata keçirilir.
“Avtobusun ödəniş üçün nəzərdə tutulan avadanlığında nasazlıq yarandığı təqdirdə isə nasazlıq tez bir zamanda aradan qaldırıla bilər və ya sərnişinlər növbəti ekspres avtobusu ilə yola salına bilərlər”, – deyə AYNA-nın rəsmisi əlavə edib.
