Suraxanı rayonunda zibil qabları dolub-daşır, məişət tullantıları yaxınlıqdakı qaz xətlərinin üstündə qalaqlanıb. Bu haqda 29 noyabr tarixində Bakuplus.az ATV-yə istinadən xəbər verir.
Yeni Suraxanı qəsəbəsi, Vahid Xəlilov, 23 ünvanında yaşayan sakinləri ən çox narahat edən zibil qutularının qaz xətlərinə yaxın qoyulmasıdır. Onlar bildirirlər ki, məişət tullantıları tez-tez burada yandırılır, bu isə təhlükəni daha da artırır.
Faktla bağlı Suraxanı Rayon Mənzil Kommunal Təsərrüfat Birliyindən
bildirilib ki, tullantı qablarının yeri yalnız Suraxanı icra nümayəndəliyinin rəsmi müraciətindən sonra dəyişdirilə bilər. “Azəriqaz” İB-dən bildirilib ki, zibil qutularının qaz xətlərinə yaxın qoyulması qaydalara uyğun deyil.
“Bu, birbaşa həm mühafizə zonasının pozulmasıdır, həm də yanğın təhlükəsizliyi qaydalarına ziddir. Ola bilər ki, həmin zibil qutuları 5 metr məsafədədir. Amma yanğın baş verən zaman küləyin istiqaməti onu artıq qaz kəmərinə yaxud da onun üzərində olan avadanlığa yaxınlaşdıra bilər və bu zaman yanğın hadisəsi qaçılmaz olacaq”, - “Azəriqaz” İB-in şöbə rəisi İlkin Behbudov.
