Paytaxtın Suraxanı rayonu, Yeni Günəşli qəsəbəsi, “Q” massivində yerləşən 13 saylı binanın sakinləri istiliklə təchiz olunmadıqları halda, adlarına borc yazılmasından narazıdırlar. Bu haqda bu gün, 10 yanvar tarixində Bakuplus.az Xəzər Xəbər-ə istinadən məlumat verir.
Sakinlərin sözlərinə görə, binada istilik sistemi mövcud olsa da, “Azəristiliktəchizat” tərəfindən xidmət göstərilmir. Çarəsiz qalan vətəndaşlar kombi sistemləri quraşdırıblar.
İddialara görə, verilməyən istiliyə görə onlardan pul tələb olunur.
“Azəristiliktəchizat” ASC-dən bildirildi ki, sözügedən binaların istiliklə bağlı problemi yoxdur. Lakin bəzi mənzillərə gedən istilik çox zəifdir.
Qurumun mətbuat katibi Elvin Basqallının sözlərinə görə, məsələ ilə bağlı əraziyə əməkdaşlar cəlb ediliblər, bir neçə mənzilin daxili xətlərində yaranmış problemlər aradan qaldırılıb. O, iddia edilən borc məbləğlərinə də münasibət bildirib. “Səsləndirilən rəqəmlərdən görünən odur ki, mənzillərin sahibləri tərəfindən uzun müddətdir ödəniş edilmir. Bununla bağlı kiminsə anlaşılmazlığı varsa, quruma müraciət edə və izahat ala bilər”, – deyə Elvin Basqallı əlavə edib.
