5 saylı Şəhər Klinik Xəstəxanasının qarşısında yaranan uzun növbə ilə bağlı açıqlama verilib. Bu haqda bu gün, 27 yanvar tarixində Qafqazinfo-ya istinadən məlumat veririk.
Ötən gün ərzində Nərimanov Tibb Mərkəzinə 1541 ambulator, 44 stasionar müraciət daxil olub. Müraciətlərlə bağlı 6000-dən çox xidmət göstərilib.
“İcbari tibbi sığortanın tətbiqi ilə daha öncə vətəndaşlar ilk növbədə sahə həkiminə müraciət etməli idilər, onun göndərişi əsasında isə ixtisaslı həkimlərə yönləndirilirdilər. Hazırda isə vətəndaşların xidmətlərə əlçatanlığı öz həllini tapsın deyə onlar birbaşa ixtisaslı həkimə müraciət edə bilirlər, artıq ailə həkiminə müraciət zərurəti yoxdur. İxtisaslı həkimlərə yardım üçün çoxsaylı birbaşa müraciətlər var. Bunların əsasında da instrumental-laborator müayinələr artır. Bu da bəzi xəstəxanalarda kifayət qədər çox növbə yaranmasına səbəb olur”, - deyə TƏBİB-dən bildirilib.
Vətəndaşlarımız növbələrdən xilas olmaq üçün poliklinikalar üzrə təhkim olunmuş ailə həkimlərinin qəbulunda ola bilərlər. Ailə həkimləri onların problemlərini müəyyənləşdirərək düzgün ixtisaslı həkimlərə göndərəcəklər.
