Türkan qəsəbəsindəki zibillik problemi hələ də həll olunmayıb. Bu haqda 17 may tarixində Bizim.media xəbər verib.
Bir neçə gün əvvəl Türkan qəsəbəsində tullantılarla bağlı xəbər
Bizim.media tərəfindən işıqlandırılmışdır. Qəsəbədə zibil qutularının olmaması səbəbindən sakinlər məişət tullantılarını küçəyə atmaq, işıq dirəklərindən asmaq məcburiyyətində qalırdılar. Bununla da natəmizlik yaranırdı və ərazini pis qoxu bürüyürdü. Sakinlər bildirirdilər ki, zibil qutuları yalnız Türkan icra nümayəndəliyi və qəsəbə bələdiyyəsinin binaları qarşısında qoyulur.
Problem ictimailəşəndən sonra Xəzər Rayon İcra Hakimiyyəti Bizim.media ilə əlaqə saxlayaraq bildirib ki, məsələ ilə bağlı yerli strukturlara tapşırıqlar verilib. Türkan bələdiyyəsinin rəsmisi Akif Əliyev bildirib ki, qəsəbənin küçələrindəki məişət tullantıları təmizlənib, əraziyə yeni zibil qutularının yerləşdirilməsi ilə bağlı İcra Hakimiyyətinə müraciət edilib.
Qəsəbə sakinləri sayta müraciət edərək bildiriblər ki, Türkan bələdiyyəsinin rəsmisi Akif Əliyev yalan açıqlama verib. Sakinlərin dediklərinə görə, məsələ ictimailəşəndən sonra sadəcə qəsəbənin üzdə görünən hissələrindən zibilliklər yığışdırılıb, bəzilərinin üzərinə isə qum səpilib. Zibil poliqonuna çevrilən boş ərazi isə ümumiyyətlə təmizlənməyib. Digər küçələrdə indi də antisanitariya vəziyyəti hökm sürür.
Sakinlər məcbur olub Ekologiya və Təbii Sərvətlər Nazirliyinə müraciət ediblər.
