Xəzər rayonu, Türkan qəsəbəsinin müxtəlif ərazilərində tullantıların yığılması ilə bağlı Dövlət Ekoloji Təhlükəsizliyi Xidmətinə daxil olmuş şikayət araşdırılaraq öz təsdiqini tapıb. Bu haqda bu gün, 24 may tarixində APA məlumat verib.
Xidmətin əməkdaşı Vaqif Cavadov bildirib ki, kəndin bir neçə yerində zibillərin saxlanması faktı aşkarlanıb və Xəzər rayon İcra Hakimiyyəti bu ərazilərin təmizlənməsini təmin edib. Yerli kommunal xidmətlər tərəfindən müvafiq tədbirlər görülüb, küçələr məişət tullantılarından təmizlənib.
Daha öncə məlum olub ki, ərazidə zibillərin atılması problemi həll olunmamış qalır. Qəsəbədə zibil qutularının olmaması səbəbindən sakinlər məişət tullantılarını küçəyə atmaq, işıq dirəklərindən asmaq məcburiyyətində qalırdılar. Bununla da natəmizlik yaranırdı və ərazini pis qoxu bürüyürdü.
