Bakının Xəzər rayonu, Türkan qəsəbəsində sakinlər içməli suyun verilməsində problem yaşayırlar. Bu haqda bu gün, 26 iyul tarixində Oxu.az məlumat verib.
Sakinlər iddia edirlər ki, evlərindən 20-30 metr məsafədə su xətti var, lakin onlar layihəyə daxil edilməyiblər. "Qonşumuzun evinə xətt çəkilib. Bu, o deməkdir ki, biz layihəyə daxil olmuşuq, amma nədənsə bizə qarşı biganəlik nümayiş etdirirlər", - deyə vətəndaşlar bildiriblər.
Bu problemlə bağlı dəfələrlə aidiyyəti qurumlara müraciət edilsə də, nəticəsi olmayıb.
“Azərsu” ASC-dən məlumat verilib ki, Türkan əhalisinin cəmi 30 faizi mərkəzləşdirilmiş su təchizatı ilə təmin olunub. Qalan 70 faizi isə içməli suya olan ehtiyacını fərdi qaydada - ya maşınlarla daşınan su ilə, ya da quyuların köməyi ilə ödəyir.
Hazırda Ceyranbatandan şəhərin şərq hissəsinə - Maştağa və Zirə istiqamətində iki magistral su xətti çəkilib. Bu iki magistral artıq yüklənib, tələbatı ödəmək üçün əlavə, üçüncü magistral su xətti çəkmək lazımdır. Bu məqsədlər üçün dövlət büdcəsindən ilkin vəsait ayrılıb.
ASC-dən bildirilib ki, bu il layihənin icrasına başlanılacaq və bununla da Zirə, Türkan, Binə, Dübəndi, Şağan, Mərdəkan və Şüvəlan qəsəbələri su ilə təmin olunacaq.
