Taksi xidmətlərində hər iki formada – həm nağd, həm kartla ödəniş üsulları mövcuddur. Amma bir çox sürücülər sifarişi qəbul etdikdən sonra müştəriyə zəng vurub ödənişi hansı formada edəcəyini dəqiqləşdirirlər. Əgər kartla ödəniş ediləcəyini eşidirsə, problem bundan sonra başlayır. Bu haqda bu gün, 9 yanvar tarixində Bakuplus.az ARB Xəbər-ə istinadən məlumat verir.
Taksi sürücüləri nağdsız sifarişləri qəbul etməmələrinə müxtəlif səbəb və yaxud bəhanələr gətirirlər. Bəziləri taksi şirkətlərindən pullarını ala bilmədiklərini deyirlər, bəziləri kartla olunan ödənişlərdə tutulan faizləri əsas gətirilər.
Taksi şirkətlərinin isə vəziyyətə yanaşması belədir: sürücülər nağdsız ödənişlərlə səfərdən imtina edə bilməzlər. Qoyulmuş xidmət standartı buna imkan vermir. Tez-tez səfərləri ləğv edən sürücülərin sistemdəki aktivlik göstəricisi azalır. Bu sifarişlərin dayandırılmasına qədər gedib çıxa bilir. Sürücü sifarişi ləğv etməyi xahiş edərsə, istifadəçi dəstək xidməti ilə əlaqə saxlaya bilər.
Təbii ki, yazılmamış mentalitet qaydalarını nəzərə alaraq, hər sərnişin xidmət qaydalarını pozan sürücü barədə şirkətə müraciət etmir. Amma sürücünün də bütün tələblərlə razılaşaraq qəbul etdiyi xidmət şərtlərini pozmaqla sərnişi yolda qoyması nə mentalitetə, nə də qaydalara uyğun gəlir.
