“TikTok” platformasında bir çoxları canlı efir açıb, bir anda varlanıb, lüks həyata sahib olurlar. Vitrindəki həyatları ilə göz önündə olurlar. Türkiyənin sosial media fenomenləri Engil və Dilan Polat da belələrindən idilər. Qısa müddətdə sadə həyat tərzlərindən şöhrət dolu həyata qədəm qoymaları insanlarda bir çox suallar yaradırdı. Şübhələr isə yersiz deyil. “TikTok” üzərindən çirkli pulların yuyulması ilə ittiham olunan bir çox fenomen həbs olundu. Ümumiyyətlə, çirkli pul nədir və necə yuyulur? Bu haqda bu gün, 27 yanvar tarixində Bakuplus.az APA TV-nin reportajına əsasən, məlumat verir.
Hüquqşünaslar deyirlər ki, beynəlxalq hüquqi statusda çirkli pullar mənşəyi məlum olmayan pullar kimi nəzərdə saxlanılır. Bu pulların bir növ leqal şəkildə rəsmiləşdirilərək rəsmi bir pul kimi bazara sızması nəzarətdə saxlanılır.
TikTok canlılarda fenomenlərə jetonlar və yüz minlərlə dollar dəyərində olan hədiyyələr göndərilir.
“Vallah deyilənlərdən sonra TikTokda qabaqlar canlı yayım açırdım ki, heç olmasa, pulumu çıxarım. İnanırsız, mənə bir dəfə şir atıblar, onu da Pərvin Abıyeva atıb. TikTokda məşhurlaşmış uşaqlar var ki, 1-2 ildir TikTokdadırlar və dayanmadan da 1 il bundan qabaq hansı sürətlə hədiyyələr atılırdısa onlara, bu gün də yenə də o sürətlə hədiyyələr atılır. Burada milyonlarla puldan söhbət gedir”, - bloger Elçin Lənbəranski deyib.
Son zamanlarda televiziyada yox, daha çox TikTok canlılarda gördüyümüz Azər Zahid əvvəlcə belə bir şeyin Azərbaycanda olmasının mümkünsüzlüyündən danışsa da, daha sonra ölkədə bu işlə məşğul olmağın asan olduğunu bildirdi.
Bəs qanunvericiliyimiz bu barədə nə deyir?
“Azərbaycan Respublikasında monitorinq xidməti bu sahəni xüsusi diqqətdə saxlayır, amma bu məsələdə, təbii ki, cinayət halının araşdırılması istiqamətində Azərbaycan Respublikasının prokurorluq orqanları istintaq prosesini həyata keçirir, bu da Azərbaycan Respublikasının cinayət məcəlləsinin 215.3.1 maddəsi ilə tənzimlənir”, - hüquqşünas Mirazər Məmmədzadə dedi.
