Bakının Sabunçu rayonunun Şuşa qəsəbəsində sakinlərdən biri su sayğacının artıq borc yazmasından şikayətlənib. Bu haqda bu gün, 21 fevral tarixində Bakuplus.az ARB Media-ya istinadən xəbər verir.
Sakin İlham Məmmədovun sözlərinə görə, ona içməli su üçün ödəniş həddindən çox yazılır:
“Evdə həyat yoldaşımla ikimiz yaşayırıq. Sayğac aya 29 ton su yazır. İki nəfərin bu qədər suyu istifadə etməsi mümkün deyil. Onlar hər ay gəlib lazım olandan çox yazırlar. “Azərsu”ya müraciət etmişəm. Lakin onlar mənə yalan danışırlar, işçilərini müdafiə edirlər”, – deyə İlham Məmmədov şikayət edir.
Sabunçu rayon Sukanal İdarəsinin rəis müavini Səbuhi Sərdarov isə məsələ ilə bağlı bildirib ki, həmin abonentin kodu 2017-ci ildə açılıb və indiyə qədər həmin sayğac 1323 kub yazıb.
“Onun borcu 48 manatdır. Sayğaclar mənzilin daxilində olduğu üçün həmin abonent bizim nəzarətçini evə buraxmır, özü bizə sayğacın göstəricilərini deyir. Bizim nəzarətçi isə abonent tərəfindən deyilən göstəricini daxil edib. İlham Məmmədovun sayğacında heç bir problem yoxdur”, – deyə Səbuhi Sərdarov bildirib.
